Հաջողակ տղամարդկանց սովորությունները

 

Մեզ հաճախ թվում է, թե հաջողությունը մեզ հետ կապ չունի։ Հաջողակ տղամարդիկ լավ պաշտոններ են զբաղեցնում, մեծ փողեր են աշխատում։ Ըստ երևույթին, նրանք պարզապես բախտավոր աստղի տակ են ծնվել և վերջ։ Բայց դա այդպես չէ։

Հաջողության գաղտնիքները

«Եթե նույնիսկ ցանկանաս տիեզերք թռչել, կթռչես»,- սրանք հայտնի երգի խոսքերն են։ Հաջողության հիմքում ընկած է ներքին մտադրությունը։ Դա պարզապես վառ ցանկություն կամ մտածված նպատակ չէ, այն ավելի խորն է։

Ցանկություններն ու նպատակները կառավարվում են մտքով, իսկ զգացմունքներն ու մտադրությունները՝ հոգով։ Լավ է, երբ կա նպատակ և ցանկություն՝ սա հաջողության հասնելու առաջին քայլն է (շատերը նույնիսկ չեն համարձակվում դա անել՝ համարելով, որ ամոթ է հաջողություն ցանկանալը)։ Բացի բազմոցին պառկելուց, հաջողության մասին երազելուց, դուք պետք է գործի անցնեք․ սա հաջողության հասնելու երկրորդ գաղտնիքն է։ Դուք պետք է պատրաստ լինեք քայլեր ձեռնարկել ձեր ընտրած ուղղությամբ։ Դուք պետք է ցանկանաք հասնել նպատակին, որպեսզի ձեր ցանկությունը վերածվի մտադրության։ Այստեղ հաճախ առաջանում են անձնային խոչընդոտներ։ Մարդկանց մեծամասնությունը սովորել է ապրել այնպես, ինչպես ապրում է։ Հոգու խորքում նրանց դուր է գալիս ծույլ լինել, ոչինչ չանել, չէ որ հաջողությունը միայն ձեռքբերումները, հարստությունը և այլ հաճելի բաներ չեն։ Հաջողությունը քրտնաջան աշխատանք է, անվերջ գաղափարներ, ձախողումներ դրանց իրականացման ճանապարհին, պատասխանատվություն և շատ այլ ջանքեր, որոնք այդ մարդիկ չեն ցանկանում ձեռնարկել։ Քրտնաջան աշխատանքը ամեն ինչում հաջողության հասնելու գաղտնիքներից մեկն է։ Հիշեք հայտնի հաջողակ մարդկանց՝ Սթիվ Ջոբսին, Բիլ Գեյթսին, Հենրի Ֆորդին, Թոմաս Էդիսոնին․ նրանք բոլորն էլ հազարավոր ժամեր են ծախսել՝ իրականացնելու իրենց երազանքները։

Վաղ առավոտից մինչև ուշ գիշեր քրտնաջան աշխատանքը նրանց օգնեց հաջողության հասնել, նրանք բազմոցին պառկած չէին երազում։ Իհարկե, երբեմն նրանց համար դժվար էր, բայց նրանք բոլոր խոչընդոտները հաղթահարեցին շնորհիվ այն էներգիայի, որը տվել էր իրենց նպատակը։ Կարևոր բանը, որն ընկած է ցանկացած հաջողության հիմքում, վստահությունն է քո և քո նպատակի նկատմամբ։ Տիեզերքը կառուցված է էներգիայի և ռեսուրսի խնայողության սկզբունքով, և հաջողությունը այդ գաղափարի կենդանի մարմնավորումն է։

Բայց բանականությունը խոչընդոտներ, հակասություններ է ստեղծում, իսկ ծրագրված պլանից ցանկացած շեղում ընկալում է որպես բոլոր հույսերի փլուզում և հանձնվելու ազդանշան։ Տիեզերքն անսահման է իր հնարավորություններում, և ամեն ինչ կարող է պատահել։

Ի՞նչ է ձեզ համար հաջողությունը

Հարստություն, ընտանիք, սեր, ընկերություն, կարիերա, փառք․ այս ամենն ավելի կոնկրետ է, քան վերացական հաջողությունը։

Այդպիսին էլ պետք է լինի ձեր նպատակը՝ կոնկրետ և դրական։ Նախ, դուք պետք է պատկերացնեք այն բոլոր մանրամասներով։ Հետո մտածեք այն մասին, թե ինչպիսին եք դուք այդ ապագայում՝ ուժեղ, համարձակ, կիրթ, խորամանկ կամ վերլուծող։

Այս սովորությունները դուք պետք է զարգացնեք ներկայում՝ հաջողության հասնելու համար։ Ի վերջո, մտածեք, թե ինչը կարող է օգնել ձեզ հասնել ձեր նպատակին։

Գնացեք սովորելու

Ամեն ինչում հաջողության հասնելու համար անհրաժեշտ է գիտելիքի մշտական հոսք։ Այդ իսկ պատճառով, կարդացեք։ Եթե կարդալ չեք սիրում, գնացեք դասընթացների կամ դասախոսությունների։ Եթե չես սիրում դասընթացների կամ դասախոսությունների հաճախել, ճանապարհորդեք։ Եթե դուք չեք կարող ճանապարհորդել, շփվեք տարբեր մարդկանց հետ։ Փնտրեք ցանկացած տեղեկատվություն ձեր թեմայի վերաբերյալ, դրան նվիրեք ձեր ազատ ժամանակի յուրաքանչյուր վայրկյանը։ Գիտելիքը երբեք շատ չի լինում, և երբեք չգիտես, թե ինչն է օգտակար և ինչը ոչ։ Գումար մի խնայեք ձեր կրթության վրա, սա միակ գրագետ և արդյունավետ ներդրումն է։

Դարձեք ձեր կյանքի հեղինակը

Ինչո՞վ են տարբերվում հաջողակները պարտվողներից։ Նրանով, որ իրենք են ստեղծում իրենց կյանքը՝ չհաշտվելով ճակատագրի կամ այլ արտաքին հանգամանքների հետ։ Երբ նրանց կյանքում ինչ-որ խոչընդոտ է լինում, նրանք իրենց 2 հարց են տալիս՝ ինչպե՞ս և ինչո՞ւ ես դա արեցի։

Փորձեք

Սկզբում դժվար կլինի, բայց շուտով դա սովորություն կդառնա, և դուք չեք նկատի, թե ինչպես եք սկսում քաղել ձեր հաջողության առաջին պտուղները։ Եթե ձեզ մոտ ինչ-որ բան չի ստացվում, դուք պետք է խոչընդոտը հաղթահարելու միջոց գտնեք։

Հոգեբանները բացահայտում են հաջողակ մարդկանց գլխավոր գաղտնիքները։ Ձեր հաջողությունը կախված է ձեր մտքերից և արարքներից։ Ինչո՞ւ են որոշ մարդիկ ավելի հաջողակ, քան մյուսները։ Եթե դուք տալիս եք այս հարցը, ապա ժամանակն է վերանայել ձեր վերաբերմունքը այս խնդրի նկատմամբ։ «Մարդիկ իրենք են իրենց հաջողակ և անհաջողակ դարձնում»,- ասում է հոգեբան Ռիչարդ Ուայզմանը։ Ուայզմանն ուսումնասիրել է հաջողության ֆենոմենը և դրա ազդեցությունը մարդկանց կյանքի վրա։ Նա իր աշխատանքն անվանում է «գիտական հետաքննություն», որը նվիրված է իրենց հաջողակ համարող և իրենց անհաջողակ համարող մարդկանց միջև տարբերությունների բացահայտմանը։ Ի՞նչ եզրակացության է եկել հետազոտության հեղինակը։

Ըստ Ուայզմանի՝ հաջողությունը ինչ-որ կախարդական ունակություն չէ։ Ամեն ինչ կախված է նրանից, թե ինչպես ենք մենք ընկալում աշխարհը և ինչպիսի վարք ենք դրսևորում։

Մարդիկ, ում հաջողակ ենք համարում, առնվազն 4 բան ճիշտ են անում․

1․Օգտվում են նոր հնարավորություններից

Նրանք, ովքեր հաջողակ են համարվում, սովորաբար միշտ նկատում են նոր հնարավորություններ և բաց չեն թողնում դրանք, իսկ երբ նրանք տեսնում են նոր հնարավորություն, նրանք հաճույքով օգտագործում են այն և պատրաստ են վճռական քայլերի։ Անհաջողակների մոտ ճիշտ հակառակն է,- ասում է Ուայզմանը։ «Նրանք թաղված են առօրյայի մեջ, հետևաբար, եթե անգամ նոր հնարավորություններ ունենան, ամենայն հավանականությամբ կվախենան օգտվել դրանցից»,- ասում է գիտնականը։

2․Լսում են ներքին ձայնին

Ընձեռնված շանսն օգտագործելու կարողությունը մեծապես կախված է ձեր ներքին ձայնը լսելու կարողությունից։ Իսկ բախտավոր մարդիկ չեն վախենում ապավինել իրենց ինտուիցիային։ Եթե զգում են, որ իրենց ընտրությունը ճիշտ է, ուրեմն վճռական քայլ են անում ու առաջ են գնում։ Անհաջողակները ի տարբերություն հաջողակների՝ սովորաբար չափից շատ են վերլուծում և հակված են ռեֆլեքսիայի, նրանք չափազանց երկար են մտածում իրենց գործողությունների ու ստեղծված իրավիճակի մասին։ Նրանց մեծ խնդիրը անվճռականությունն է։ «Նրանցից չափազանց երկար ժամանակ է պահանջվում որևէ որոշում կայացնելու համար։ Եվ, որպես կանոն, նրանց մտածողությունը գնում է ոչ այնքան արդյունավետ ուղղությամբ»,- ասում է Ուայզմանը։

3․Հույսը դնում են հաջողության վրա

Լինելով լավատես, հաջողակները, սկսելով ցանկացած գործ, հույսը դնում են հաջողության վրա։ «Նրանք վճռական են տրամադրված, որ ամեն ինչ լավ է լինելու, և նման վստահությունը դառնում է յուրօրինակ կանխատեսում»,- ասում է Ուայզմանը։ Իհարկե, միշտ չէ, որ նրանց լավատեսական ակնկալիքները արդարանում են, սակայն դրական վերաբերմունքն օգնում է նրանց հաղթահարել դժվար ժամանակները՝ ավելի քիչ կորուստներով։ Անհաջողակները հակված են հոռետեսության և դա վանում է մարդկանց։ Այն պատճառով, որ նրանք սովորաբար ընկճված վիճակում են և բավականին մռայլ տեսք ունեն, մյուսները փորձում են խուսափել նրանցից,- ասում է Ուայզմանը։

4․Չեն հանձնվում

Գլխավորը դրական վերաբերմունքը պահպանելն է։ Յուրաքանչյուրս էլ գիտակցում ենք, որ մեզանից ոչ ոք պաշտպանված չէ կյանքում անհաջողություններից և վատ բաներից, սակայն հաջողակ մարդիկ ի վիճակի են ավելի արագ վերականգնվել վշտից, պարտությունից կամ ձախողումից։

Նրանք դասեր են քաղում անհաջող փորձից և չեն ընկճվում։ Այդ կարողությունը անհաջողությունը դրական փորձի է վերածում։ Նրանք, ովքեր իրենց անհաջողակ են համարում, ի տարբերություն հաջողակների՝ սովորաբար հուսահատվում են նույնիսկ փոքր անհաջողության դեպքում և հանձնվում են, երբ նրանց ճանապարհին աննշան խոչընդոտ է հայտնվում։ Նրանք համոզված են, որ ապագան մռայլ է լինելու, և իմաստ չունի փորձել հաջողության հասնել։ Ցանկանո՞ւմ եք հաջողակ լինել։ Բարեբախտաբար, անհաջողակների համար էլ հույս կա։ Ռիչարդ Ուայզմանը ասում է, որ հոգեբանական մի շարք մեթոդներ կօգնեն հոռետեսներին սովորել իրենց հաջողակ մարդ համարել և գործել հաջողակ մարդու պես։ Այդ տեխնիկաներից մեկը հաջողակ մարդու օրագիր պահելն է, որտեղ պետք է գրի առնել օրվա ձեռքբերումները։ «Գրանցեք այսօր ձեզ հետ պատահած ամենադրական բաները, որքան էլ դրանք չնչին լինեն»,- խորհուրդ է տալիս Ուայզմանը։ Սա օգնում է նվազեցնել աշխարհի և դրանում սեփական անձի բացասական ընկալման մակարդակը և կենտրոնանալ կյանքի դրական կողմերի վրա։ Իսկապես, մեր կյանքում շատ բաներ մեր վերահսկողությունից դուրս են, և կյանքում շատ իրադարձություններ տեղի են ունենում մեր կամքին հակառակ։ Բայց «հաջողակ մարդու օրագիր» պահելը կօգնի մեզ ավելի կենսունակ վերաբերմունք ձևավորել տեղի ունեցողի նկատմամբ։

Նյութի աղբյուրը՝ Թամարա Ավանեսյան- «Կանայք և տղամարդիկ»