Խորհուրդներ տուրիզմի ոլորտի մասնագետներին

 

Տուրիստական գործակալություններն այսօր բավականին շատ են, և նրանց մոտեցումները գրեթե նույնն են: Շատերն անգամ չեն էլ գիտակցում, որ ավանդական մեթոդներն այս ոլորտում կարող են լավագույն դեպքում գոյատևման աղբյուր լինել կամ էլ՝ վերջնական կործանման:

Տարբերվեք մրցակիցներից: Եթե տարբերվում եք, ձեր յուրահատկության մասին մարդիկ սկսում են խոսել, պատմել իրենց ընկերներին, այդ մասին կարող են գրել նաև ԶԼՄ-ները: Օրինակ՝ աշխատանքը ավելի ուշ ժամի վերջացնելը կամ շաբաթ և կիրակի օրերին աշխատելը: Միգուցե հենց աշխատանքային գրաֆիկի փոփոխությունն էլ դառնա մրցակցային առավելություն: Կա՛մ էլ կարող եք աշխատել տոն օրերին և հատուկ այդ օրերի համար առաջարկել ակցիաներ և գրավել մարդկանց: Տուրիստական գործակալություններից մեկը մարդկանց չի հրավիրում իր գրասենյակ, այլ մենեջերն է թղթապանակով, ծնկադիր համակարգչով այցելում տարբեր գրասենյակներ՝ խնայելով իր հաճախորդների ժամանակը: Եթե չտարբերվեք, ձեզ ոչ ոք չի հիշի, ուշադրություն դարձրեք զինվորներին, նրանք բոլորն էլ նույն համազգեստն ունեն, և յուրաքանչյուրիս թվում է, թե նաև նույն դեմքն ունեն, այնպես որ մտածեք տարբերվելու մասին:

Հաջորդ քայլը, որ կարելի է առանց որևէ մեծ գումարի կատարել, ձեր գովազդային հարթակը մյուսներին տրամադրելն է: Ենթադրենք, ձեզ հարկավոր է հաշվապահական ծառայություն կամ, ասենք, կահույք: Դուք կարող եք այդ ընկերություններին հայտ ուղարկել, որ հետաքրքրված եք իրենց ապրանքներով կամ ծառայություններով, և նրանք նամակով ձեզ ուղարկեն առաջարկները: Ի պատասխան, դուք կարող եք գրել, որ իրենց համար ունեք հատուկ առաջարկ և ձեր փաթեթներն անվճար ուղարկել գումար ունեցող մարդկանց՝ չմոռանալով տեղադրել նաև ձեր կայքի հղումն ու սոցցանցերում ձեր էջերը: Մի թեթև հնարքով, առանց գումար ծախսելու, բազմաթիվ մարդկանց տեղեկացնում եք ձեր ծառայության մասին:

Վլադիվյոստոկում գտնվող տուրիստական ընկերություններից մեկի աշխատակիցները ճշտում էին մեծ ընկերությունների հիմնադրման տարեթվերն ու օրերը և յուրահատուկ վերաբերմունք էին ցույց տալիս այդ օրերին: Հոբելյանական օրվանից մոտ 2 ամիս առաջ տուրիստական ընկերությունը գեղեցիկ նամակով շնորհավորում էր և առաջարկում, որ իրենց կորպորատիվ երեկոն անցկացնեն ինչ-որ հանգստյան տանը կամ արտերկրում: Որպես արդյունք՝ տուրիստական ընկերությունը ձեռք էր բերում ոչ միայն նոր, այլ նաև հավատարիմ հաճախորդներ:

Մյուս խորհուրդը վերաբերում է տեղին: Եթե տարածք վարձակալեք բիզնես կենտրոնում, որտեղ մեծ թվով ընկերություններ կան, ապա ավելի շատ հնարավորություն կունենաք մարդկանց ձեր մասին տեղեկացնելու: Բիզնես կենտրոնում փորձեք ծանոթություն հաստատել պահակի և հավաքարարի հետ, քանի որ այս մարդիկ շատերի հետ են շփվում, և շատերն են նրանցից տեղեկություն ճշտում: Ի դեպ, տուրիստական ընկերություններից մեկը հրաժարվեց հիպերմարկետում վարձակալած տարածքից և փոխարենը տարածք ընտրեց օպտիկայի խանութի կողքին: Մարդիկ իրենց ակնոցը տալիս էին նորոգման և սպասելու ժամանակն անցկացնում տուրիստական գործակալության գրասենյակում: Տեղափոխման արդյունքը եղավ այն, որ վաճառքն ավելացավ 3 անգամ:

Կարևոր հանգամանքներից են գրասենյակի ներքին հարդարանքը և «բաց դռների քաղաքականությունը». հնարավորության դեպքում գրասենյակի դուռը բաց թողեք: Հայտնի է, որ բաց դուռն ավելացնում է մարդկանց հոսքը: Որպեսզի ներս մտնելիս մարդն անմիջապես զգա, որ տուրիստական գործակալությունում է, պատերին փակցրեք գեղեցիկ քաղաքների նկարներ, ծովափնյա հանգստյան վայրեր, հանգիստը պատկերող նկարներ: Այցելուներին ցույց տվեք ձեր պրոֆեսիոնալիզմը, պատերին փակցրեք ձեր ստացած դիպլոմներն ու պարգևատրումները: Ցանկալի է նաև պատերին փակցնել մարդկանց կարծիքը ձեր մենեջերների ու գործակալության մասին: Ընդ որում, նախընտրելի է, որ տեքստը գրիչով գրված լինի: Այցելուները սիրով կկարդան, մինչ դուք կլրացնեք իրենց փաստաթդթերը:

Գրասենյակում փակցրեք ձեր մենեջերների այցելած երկրների նկարները: Ցանկալի է, որ գործակալության աշխատակիցը մեծ պլանով նկարում երևա, ինչպես նաև այն հետաքրքիր վայրերը, որտեղ նա այցելել է: Նման նկարները հաճախորդին հասկացնել են տալիս, որ դուք ամեն ինչ փորձել եք, և հստակ գիտեք, թե ինչ եք առաջարկում, այլ ոչ թե համացանցից ներբեռնած նկարներ եք ցուցադրում: Լինում են դեպքեր, երբ հաճախորդը, տեսնելով մենեջերների նկարները, փոխում է նախնական որոշումը և ուղևորվում մենեջերների գնացած վայրերը: Կարևոր է նաև ունենալ նախորդ հաճախորդների՝ գոհունակ դեմքերով նկարներ: Մի շարք տուրիստական գործակալություններ հենց գործակալությունում վաճառում են նաև լրացուցիչ ապրանքներ՝ արևայրուքի դեմ քսուքներ, տարբեր երկրների քարտեզներ, բառարաններ, ինքնաթիռում գլխի տակ դնելու բարձիկներ, փաստաթղթերի համար փոքրիկ պայուսակներ:

Կարող եք նաև նվերներ տալ: Ամեն դեպքում, փորձեք այնպես անել, որ ձեզ հիշեն, շատ կարևոր է ձեր ընկերության մասին մարդկանց ենթագիտակցության մեջ հետք թողնելը: Ունեցեք ձեր ընկերության լոգոտիպով բաժակներ, գրիչներ, յուրաքանչյուր սեղանին դրեք ընկերության անվանմամբ թերթիկ, որպեսզի այն հաճախորդի աչքի առջև լինի: Մտեք ձեր գրասենյակ ու նայեք, թե քանի անգամ է ձեր անունը երևալու այցելուի աչքին:

Էլ ի՞նչ իմաստ ունի ընտրել գործակալության անուն, եթե այն ոչ ոք չի հիշելու: Տուրիզմը լավ տրամադրություն հաղորդելու բիզնես է: Ներքին հարդարանքն այնպես կազմակերպեք, որ այցելուն իմանա ձեր երկարակեցության մասին: Եթե գործակալությունում առկա են բազմաթիվ հուշանվերներ, տարբեր երկրներից բերված նվերներ, ապա դա խոսում է երկար տարիներ տուրիստական ոլորտում աշխատելու մասին: Օրինակ՝ Open Travel-ում ապակե տարաներում ներկայացված են տարբեր ծովափերից բերված ավազներ: Այդ փաստը խոսում է այն մասին, որ գործակալությունը նորեկ չէ, բավականին փորձ ունի շուկայում:

Յուրաքանչյուր աշխատակից հագուստի վրա պետք է կրի տարբերանշան, որի վրա խոշոր տառերով գրված է իր անունը: Տուրիստական գործակալությունների դիմաց սովորաբար տեղադրված է լինում հատուկ գովազդային հարթակ, որտեղ ներկայացվում են առաջարկները: Դրանք տեղադրեք՝ հաշվի առնելով այն հանգամանքը, որ մարդիկ քայլելիս դիմացն են նայում, ոչ թե կողքը: Վահանակի վրա օգտագործեք խոշոր տառատեսակներ, իդեալական դեպքում այն պետք է տեսանելի լինի 10-ից 15 մետր հեռավորությունից:

Անպայման խոշոր տառերով գրեք հեռախոսահամարը, կայքի հասցեն ու գործակալության աշխատաժամերը: Վահանակի վրա մի քանի շրջագայությունների մասին մի գրեք, այլ գրեք այն շրջագայության մասին, որը գրավիչ է թե՛ գնային, թե՛ պայմանների առումով, այնուհետև կներկայացնեք նաև այլ շրջագայություններ: Ուշադրություն գրավելու համար մտածեք վահանակի վրա ինչ-որ յուրահատուկ տարր, իր տեղադրել, օրինակ՝ օդապարիկ, փուչիկ, փոքրիկ լաստանավ:

Տուրիստական կայքը պետք է մեկ գործառույթ ունենա՝ դառնալ գործակալության տեղեկատվական հարթակը համացանցում: Ուշադրություն դարձրեք, թե ձեր կայքն ինչպես է ցուցադրվում տարբեր բրաուզերներում, ինչպես նաև հեռախոսում: Հետևողական եղեք նաև կայքի գույների հարցում: Եթե դուք չհասկանաք, թե որ գույնն ինչպես է ընկալվում մարդկանց կողմից, թերևս կորցնեք ձեր պոտենցիալ հաճախորդների մի մասին: Ահա խորհուրդներ, որոնք կօգնեն գույների և կայքի արտաքին տեսքի հարցում՝

Կարմիր գույնը գործողության մղող գույն է, ուստի այն պետք է օգտագործել «մագնիս» բառերի հետ, որոնցից են՝ «Ակցիա», «Զեղչեր», «Նվերներ», «Բոնուս», «Հատուկ առաջարկ»: Այս բառերը այցելուին գործողության են մղում, և կարմիր գույնը պետք է օգտագործել այս դեպքում:

Կապույտ գույնը հանգստության գույն է և կարելի է օգտագործել որպես գովազդային տեքստերի խորապատկեր:

Շատ յուրահատուկ է երկնագույնի ու սպիտակի միացությունը, որը զուգորդվում է ջրի և երկնքի հետ, ուստի եթե տեղադրում եք հյուրանոցների նկարներ, ապա ցանկալի է, որ լինեն երկնագույն-սպիտակ երանգների մեջ:

Եթե դուք կոնկրետ դիրքավորված եք որպես VIP հաճախորդների կայք, ապա կարող եք օգտագործել ոսկեգույն և սև գույները: Այս գույները կարգավիճակի և թանկության խորհրդանիշ են:

Յուրաքանչյուր կայքի վերին ձախ մասում միշտ դրվում է ընկերության անունն ու լոգոն: Շատ կարևոր է, որ այդ վայրում դրվեն նաև հեռախոսահամարն ու էլեկտրոնային հասցեն: Շատ կայքերում այս տվյալները տեղադրված են «Կապ» բաժնում, այնինչ պետք է նաև գլխավոր էջում լինեն՝ այցելուի աչքի առջև:

Ստուգված փաստ է, որ մարդիկ ավելի հաճախ են զանգում գծիկով առանձնացրած համարների դեպքում, օրինակ՝ ավելի հարմար է զանգահարել 055-44-36-77, քան՝ 055 443677 հեռախոսահամարին: Ինչքան աչքի ընկնող լինի հեռախոսահամարը, այնքան զանգերի հավանականությունը մեծանում է:

Կարևոր է, որ հենց սկզբից այցելուն նկատի բավականին լավ պայմաններով շրջագայության առաջարկ: Այդ դեպքում կարելի է օգտագործել գործողության մղող բառեր՝ «Ամրագրեք այսօր», «Զանգահարեք հենց հիմա», «Պատվիրեք մինչև հունվարի 10-ը»: Նման առաջարկներով գրավում եք կայք այցելողի ուշադրությունը, այլապես շատ շատերը մոտ 5 վայրկյանից փակում են էջը և անցնում մյուսին: Շատ կայքերում կա «Մեր մասին» բաժինը: Ճիշտ է, ցանկալի է, որ բոլորն իմանան ձեր մասին, սակայն ավելի լավ կլինի այդ բաժինը փոխարինել ձեր մասին կարծիքներով, քանի որ այցելուին հանգիստն է հետաքրքիր, և եթե նա կարդում է մյուսների տպավորությունները, ծառայություններից գոհ լինելը, ապա վստահությունն ավելի է մեծանում:

Շատ կարևոր է նաև տեղադրել մենեջերների այցի կամ ձեր նախորդ հաճախորդների նկարները, դա կավելացնի մարդկանց վստահությունը: Յուրաքանչյուր այդպիսի նկարի տակ անպայման գրեք մենեջերի էլեկտրոնային հասցեն և գրասենյակի հեռախոսահամարը:

Կայքում գրեք նաև, թե ինչպիսի ակցիաներ են գործում, ինչ օգուտ կունենա այցելուն, եթե շուտ պատվիրի շրջագայությունը, ինչքան կտնտեսի: Իսկ սոցիալական ցանցերում սեփական էջի առաջխաղացման մասին կարող եմ չնշել, քանի որ դա, ինչպես նաև կայքում սոցցանցի էջի հղումները պարտադիր են: Տուրիստական մեծ հոսք կարող եք ունենալ նաև սոցիալական ցանցերից: Այնտեղ փորձեք հետաքրքիր վիկտորինաներ, մրցույթներ կազմակերպել: Շատերն են սիրում մասնակցել մրցույթների:

Հիշեք, կարևորը գեղեցիկ կայքը չէ, կարևորն այն է, որ այն ձեզ համար հաճախորդներ ու վաճառք ապահովի: Ձեր այցեքարտը պետք է ներկայացնի ոչ միայն ձեզ ու ձեր գործակալությունը, այլ նաև առաջարկները: Խորհուրդ եմ տալիս օգտագործել այցեքարտերի 2 կողմերը, որտեղ մի կողմում ներկայացվում են ձեր տվյալները, իսկ մյուս կողմում՝ ձեր շրջագայություններից օգտվելու դեպքում զբոսաշրջիկի ստանալիք օգուտը:

Իսկ ինչպե՞ս անել, որ հաճախորդները կրկին այցելեն ձեզ: Դիտարկենք մի քանի օրինակ՝

Երբ ձեր հաճախորդները հասնում են տեղ, զանգահարեք հյուրանոց և հարցրեք, թե արդյոք ամեն ինչ կարգի՞ն է:

Երբ նրանք վերադառնում են, զանգահարեք և ճշտեք, թե արդյո՞ք գոհ էին հանգստից:

Հարցրեք նրանց՝ եթե կցանկանան, ապա ձմռանը կամ ամռանը նրանց էլեկտրոնային հասցեին կրկին հետաքրքիր առաջարկներ կուղարկեք կամ էլ զանգահարելով կտեղեկացնեք:

 Ձեր հաճախորդներին պարբերաբար շնորհավորեք Ամանորի, Սուրբ Ծննդյան, Ապրիլի 7-ի, ծննդյան օրվա կապակցությամբ:

Հիշեցրեք նրանց, որ վերջանում է քարտի ժամկետը:

Եթե հաճախորդը ձեր ծառայությունից օգտվել է դեկտեմբերին, ապա նրան քարտ տվեք, որը միայն հաջորդ տարվա օգոստոսին ներկայացնելով՝ նա կարող է, ենթադրենք, պատվիրել ինչ-որ շրջագայություն, որի ժամանակ սնունդը կամ որևիցե այլ լրացուցիչ ծառայություն անվճար է լինելու: Մի թողեք, որ հաճախորդները ձեզնից հեռանան, լրացուցիչ ազդակ տվեք, որ հաջորդ տարի դարձյալ դիմեն: Ցանկալի է բոնուս քարտ տալ, որը կստիպի հաճախորդին կրկին օգտվել ձեր ծառայություններից: Քարտը կարող է լինել կամ կուտակային, կամ զեղչային՝ կախված ձեր ընտրությունից: Խորհուրդ եմ տալիս քարտերի համար սահմանել վերջնաժամկետներ, քանի որ դա կարագացնի գործողությունը: Օրինակ՝ եթե տվյալ հաճախորդը չի ցանկանում հանգստանալ, միգուցե իր ծանոթներից մեկին տա քարտը, որը կօգտվի զեղչից և կդառնա գործակալության նոր հաճախորդ:

Նյութի աղբյուրը՝ Վահագն Դիլբարյան- «100 բիզնես գաղտնիքներ»