Ճապոնացի գրող Յասունարի Կավաբատայի Նոբելյան ճառը

 

Ձե՛րդ մեծություն,

Ձե՛րդ թագավորական վսեմություններ,

Ձե՛րդ գերազանցություն պարոն նախագահ,

Նոբելյան հիմնադրամի հոգաբարձունե՛ր,

Շվեդական թագավորական ակադեմիայի անդամնե՛ր,

տիկնա՛յք և պարոնա՛յք,

ինձ համար մեծ պատիվ է առաջադրվել Շվեդական ակադեմիայի 1968 թվականի Գրականության Նոբելյան մրցանակին և պարգևը ստանալ անձամբ Ձերդ մեծությունից:

Այս մրցանակի գերագույն արժեքը նրանում է, որ այն տրվում է նաև օտարերկրացիներին: Դա մրցանակին տալիս է համաշխարհային նշանակություն: 2 ճապոնացիներ՝ դոկտոր Յուկավան և դոկտոր Տոմոնագան վերջին տարիներին դարձան ֆիզիկայի Նոբելյան մրցանակակիրներ: Ալֆրեդ Նոբելը չափածո և արձակ տեքստեր էր գրում մի քանի լեզուներով, և սրան համահունչ՝ նաև գրականության բնագավառում են Նոբելյան մրցանակներ ստանում տարբեր երկրների գրողներ: 55 տարի է անցել այն օրից, երբ մրցանակը վերջին անգամ գնացել է Արևելք՝ Ռաբինդրանաթ թագավորին: Հաշվի առնելով լեզվական բարդությունները և այն հանգամանքը, որ իմ գործերը, առավել քան ուրիշներինը, հավանաբար մեծ մասամբ ընթերցվել են թարգմանությամբ, ես պիտի իմ մեծ ու խորին երախտագիտությունը և ակնածանքը հայտնեմ Ակադեմիայի մեծարգո անդամներին՝ կայացրած որոշման առթիվ: Կարծում եմ՝ այն փաստը, որ վերջին 55 տարիներին առաջին անգամ մրցանակը ստանում է Արևելքի ներկայացուցիչը, զորեղ տպավորություն կթողնի Ճապոնիայում, գուցե և Ասիայի այլ պետություններում, ինչպես նաև աշխարհի բոլոր այն երկրներում, որոնց լեզուն միջազգային տարածում չունի: Այսպիսի մրցանակ ստանալը չեմ համարում միայն իմ բախտավորությունն ու երջանկությունը: Իմ հույզերը շատ ավելի անանձնական են դառնում այն մտքից, որ այս մրցանակը գուցե նոր և համընդհանուր նշանակություն ունենա ողջ համաշխարհային գրականության համար:

Այսպիսինն են իմ հույզերը՝ համակցված այն պատվի հետ, որ Ձերդ գերազանցություն Ակադեմիայի անդամները ինձ հետ միասին շնորհել են նաև մյուս բնագավառների այս տարվա մրցանակակիրներին, և մեկ այլ պատվին՝ հնարավորություն ունենալ այս վիթխարի իրադարձության գլխավոր ամբիոնից շնորհակալական խոսք ասելու: Ըստ իսկ՝ այս մրցանակը Արևմուտքի և Արևելքի փոխըմբռնման ու բարեկամության խորհրդանիշն է, այն գրականության խորհրդանիշը, որ կա այսօր ու կլինի վաղը: Շնորհակալություն: