Արցախյան մեծ հարսանիքը

 

2008 թվականի հոկտեմբերին մոսկվացի գործարար Լևոն Հայրապետյանի նախաձեռնությամբ Գանձասարում, Շուշիում և Ստեփանակերտում կազմակերպվել էր «Մեծ արցախյան հարսանիքը». պսակադրվել էին 674 երիտասարդ զույգեր։

Հարսանիքից հետո, Ռուսաստանում բնակվող հայկական ծագմամբ մի շարք գործարարներ ու բարեգործներ՝ Լևոն Հայրապետյանը, Ռուբեն Վարդանյանը, Սերգեյ Սարկիսովը, Դանիլ Խաչատուրովը, Աշոտ Խաչատրյանը, Գագիկ Զաքարյանը, Սեյրան Կարապետյանը, Գոռ Նահապետյանը, Կարեն Մկրտչյանը, Արարատ Թավադյանը, Վլադիսլավ Ղասումյանը և Սամվել Սարգսյանը, որոշել էին աջակցել նորաստեղծ ընտանիքներին։

Ռուբեն Վարդանյանը դարձել էր 250 զույգի կնքահայրը և որոշել էր նրանց ֆինանսական օժանդակություն ցուցաբերել 5 տարվա ընթացքում։

Ընտանիքներին, որտեղ ծնվում էր առաջին երեխան, տրամադրվում էր 2000, յուրաքանչյուր երկրորդ երեխայի համար ընտանիքը ստանում էր 3000, երրորդի համար՝ 5000 դոլար։

2013 թվականի դեկտեմբերին ստացանք 5 տարվա մանրամասն վիճակագրությունը, որի հիման վրա պետք է կազմվեր IDeA հիմնադրամի ամփոփիչ հաղորդագրությունը:

2009-2011 թվականների ընթացքում 219 ընտանիքներում ծնվել էր 301 երեխա, և Ռուբեն Վարդանյանի հատկացրած ֆինանսական օժանդակության ծավալը նշված ժամանակահատվածում կազմել էր $ 682 000:

2012 թվականին 13 ընտանիքում ծնվել էին առաջնեկներ, 55-ում լույս աշխարհ էին եկել երկրորդ երեխաները, ևս 10 ընտանիքում՝ երրորդ զավակները. ֆինանսական աջակցության ծավալը կազմել էր $ 240 000:

2013 թվականին հատկացումների ծավալը կազմել էր $ 119 000:

Ծրագրի 5 տարվա գործունեության ընթացքում Ռուբեն Վարդանյանը արցախյան ընտանիքներին ցուցաբերել էր 1 041 000 դոլարի օժանդակություն։

«Հուսով եմ՝ ծրագիրն օգտակար էր և իր լուման ունեցավ Արցախում մարդկանց կյանքի բարելավման գործում: Հայաստանի և Արցախի անկախությունը բացարձակ արժեք է՝ ձեռք բերված հսկայական զոհերի և զրկանքների գնով: Այդ պատճառով մենք անհրաժեշտ ենք համարում գոյատևման մոդելից անցնել բարգավաճման մոդելին, և դա վերաբերում է նաև Արցախում մեր ծրագրերի բովանդակությանը և ուղղվածությանը»,- ասել էր Ռուբեն Վարդանյանը:

Նյութի աղբյուրը՝ Արա Թադևոսյան- «Ռուբեն Վարդանյան. Դոն Կիխոտն ու վիշապները»