Թիմերի արդյունավետության գնահատումը

 

Թիմային աշխատանքի կազմակերպման բավական կարևոր խնդիր է թիմի արդյունավետության մակարդակի գնահատումը, որը պետք է պատասխանի այն հարցին, թե արդյոք տվյալ թիմն ունակ է հասնելու իր նպատակներին: Սա էական է, հատկապես հաշվի առնելով, որ գնալով ավելի ու ավելի շատ բիզնես գործընթացներ են իրականացվում թիմերի միջոցով, և որ կազմակերպությունների գործունեության կայունությունը դրականորեն կապված է հաջող թիմային աշխատանքի հետ:

Թիմային աշխատանքը կազմակերպության գործունեության համար ունի կարևոր ռազմավարական նշանակություն, քանի որ թիմի անդամները բարձրացնում են իրենց հմտությունները, գիտելիքները և կարողությունները թիմերում աշխատելով, ինչն ազդում է կազմակերպության գործունեության և արդյունավետության վրա:

Կազմակերպությունները կենտրոնանում են թիմային աշխատանքի վրա՝ մրցակցային առավելություն ապահովելու, համագործակցության միջոցով խնդիրները լուծելու և աշխատակիցների ստեղծագործական կարողությունները խրախուսելու համար: Թիմերը կարող են ապահովել ավելի բարձր հարմարվողականություն, արտադրողականություն և կրեատիվ գործելաոճ, քան ավանդական ստորաբաժանումները, կազմակերպական խնդիրների լուծման համար առաջարկում են ավելի բարդ, նորարարական և համապարփակ լուծումներ: Հետևաբար, թիմային աշխատանքը ժամանակակից բիզնեսի զարգացման կարևորագույն ուղղություններից մեկն է:

Թիմի կատարողականի գնահատման հայտնի մոտեցումներից է հանդիսանում ներդրում-գործընթաց-արդյունք շրջանակային մոդելի կիրառումը:

Ներդրումներն այն գործոններն են, որոնք խթանում և սահմանափակում են մասնակիցների փոխազդեցությունը, ինչպիսիք են իրավասությունները, անհատականությունները, առաջադրանքի կառուցվածքը, առաջնորդի ազդեցությունը, կազմակերպչական կառուցվածքի առանձնահատկությունները և արտաքին միջավայրի բարդությունը: Գործընթացները նկարագրում են, թե ինչպես են կատարված ներդրումները վերածվում արդյունքների: Վերջիններս թիմային աշխատանքի արդյունքներն են, որոնք գնահատվում են մեկ կամ մի քանի դերակատարների կողմից, որոնք կարող են ներառել իրականացման ֆիզիկական աստիճանը, որակական գնահատականներ, օրինակ, անդամների արձագանքները (օրինակ՝ բավարարվածություն, նվիրվածություն, կենսունակություն):

Տարիների ընթացքում մոդելի մի քանի թարմացումներ են եղել, և այսօր այն դիտվում է որպես թիմի կատարողականը գնահատելու մեկնարկային կետերից մեկը:

Թիմային աշխատանքը կարող է ունենալ տարբեր հետևանքներ, և որ ղեկավարները պետք է իմանան, թե ինչ քայլեր ձեռնարկեն արդյունավետ թիմային աշխատանք ապահովելու համար:

Թիմի արդյունավետության ֆունկցիոնալ մոտեցումը կենտրոնանում է նպատակների, ինտեգրման, որոշումների կայացման, հանդիպումների կառավարման և որոշումների իրականացման, առողջ թիմային մթնոլորտ ստեղծելու վրա: Իհարկե, այս գործառույթներից որոշները տարբեր թիմերում տարբերվում են, օրինակ՝ արտադրական կամ սպասարկման ոլորտներում, կառավարման թիմերում կամ ինժեներական թիմերում:

Թիմի կատարողականը կարելի է դիտարկել մի քանի տեսանկյունից: Մասնավորապես, արտադրողականությունը, համախմբվածությունը և ուսումնառությունը դիտարկվում է որպես թիմային աշխատանքի 3 կարևորագույն չափանիշներ: Այլ մոտեցմամբ էլ թիմի արդյունավետությունը դիտարկվում է որակի տեսանկյունից՝ որոշման որակ, արտադրանքի որակ, արտադրության քանակ:

Թիմային աշխատանքի հիմնական արդյունքները առաջադրանքի կատարման արդյունքներն են, ինչպիսիք են սխալների մակարդակը, կատարման ժամանակահատվածը, մասնակիցների բավարարվածությունը և ուսուցման արդյունքները, ինչպիսիք են կատարելագործված գիտելիքները, հմտությունները: Թիմային աշխատանքի արդյունավետության պոտենցիալ ցուցանիշներից մեկն էլ հաճախորդների գոհունակությունն է:

Թիմի արդյունավետությունը գնահատելու համար գոյություն ունեն նաև այլ չափանիշներ, որոնք վերաբերում են թիմի անդամների աֆեկտիվ ռեակցիաներին և թիմի կենսունակությանը: Աֆեկտիվ ռեակցիաները սովորաբար վերաբերում են թիմում տիրող մթնոլորտին: Թիմի կենսունակությունը սովորաբար կապված է աշխատակիցների բավարարվածության, թիմային մթնոլորտի, նվիրվածության և խմբի համախմբվածության հետ, որոնք էլ կիրառվում են որպես կենսունակության գնահատման ցուցանիշներ:

Նյութի աղբյուրը՝ Կարեն Սարգսյան- «Մարդկային ռեսուրսների կառավարում»