Բանակցային սեղանների նկարագրությունն ու մասնակիցների նստեցման կարգը

 

Բանակցությունների նախապատրաստման ու անմիջական վարման գործընթացի կազմակերպչական կարևոր հիմնահարցերից են նաև բանակցային սեղանների ճիշտ ընտրությունն ու դասավորությունը, ինչպես նաև բանակցությունների տեսակից ելնելով՝ մասնակիցների նստեցման կարգի որոշումը: Բանակցային պրակտիկայում կիրառվում են բանակցային սեղանների հետևյալ դասավորությունը.

ա.շրջանաձև դասավորություն

բ.օվալաձև սեղաններ ու դասավորություն

գ.սեղանների ուղղանկյուն դասավորություն

դ.սեղանների II-աձև դասավորություն

ե.սեղանների քառակուսի դասավորություն

Ընդհանրապես, հակամարտությունների խաղաղ կարգավորմամբ զբաղվող մասնագետները խորհուրդ են տալիս բանակցային սրահները կահավորել այնպես, որ հնարավորինս խուսափեն սուր անկյուններից, այդ իսկ պատճառով էլ առավել նախընտրելի բանակցային են օվալաձև ու շրջանաձև սեղանները: Շրջանաձև սեղանները դրվում  են այն ժամանակ, երբ սեղանի շուրջ նստած բանակցությունների բոլոր մասնակիցները հավասար են իրենց կարգավիճակով (օրինակ՝ բոլոր կողմերը ներկայացված են նախագահների կամ վարչապետների մակարդակով): Ուղղանկյունաձև սեղանները նույնպես հաճախ են կիրառվում հիմնականում գործարար կամ էլ ընդլայնված կազմով բանակցությունների ժամանակ: II-աձև դասավորությունը ավելի շատ բնորոշ է կոնֆերանսային դիվանագիտությանը, երբ բանակցություններին մասնակցում են մի քանի երկրների պատվիրակություններ, ինչպես նաև կիրառվում է դիվանագիտական ճաշկերույթների ժամանակ: Բանակցությունների ժամանակ հիմնականում խորհուրդ չի տրվում սենյակը կահավորել քառակուսի սեղաններով: Բայց եթե, այնուամենայնիվ, դրված է քառակուսի սեղան, դա նշանակում է, որ կազմակերպիչները ցանկանում են ընդգծել կողմերի հստակ սուբորդինացիան: Նման սեղաններ հիմնականում նպատակահարմար է կիրառել կարճ խորհրդակցությունների ու աշխատանքային հանդիպումների համար, այլ ոչ թե բանակցությունների:

Բանակցությունների վարման գործընթացում շատ կարևոր է նաև բանակցային մասնակիցների նստեցման ճիշտ կարգը հաշվի առնելը: Tet a Tet ռեժիմով բանակցելիս կիրառվում են հետևյալ դասավորությունները.

·  անկյունաձև դասավորություն, երբ բանակցող կողմերը նստում են միմյանց նկատմամբ մի փոքր անկյան տակ: Նպատակահարմար է բարեկամաբար տրամադրված կողմերի միջև շփումները կազմակերպելիս: Այդ դիրքը թույլ է տալիս զրույցը վարել անկաշկանդ մթնոլորտում:

· սեղանի միևնույն կողմում նստեցման կարգ, որը ենթադրում է հարաբերությունների ու փոխադարձ վստահության շատ բարձր մակարդակ: Այս դիրքը հարմար է բանակցային փաստաթղթերի նախագծերի շուրջ համատեղ աշխատանքի կազմակերպման տեսանկյունից:

· դեմ առ դեմ՝ սեղանի տարբեր կողմերում նստեցման կարգ: Հիմնականում կիրառվում է արարողակարգային, պաշտոնական բանակցությունների ժամանակ:

·   սեղանի տարբեր կողմերում՝ անկյունաձև նստեցման կարգ: Այս դիրքը ենթադրում է կողմերի միջև հարաբերությունների լարվածության մեծ աստիճան: Հազվադեպ է կիրառվում բանակցությունների ժամանակ:

Նյութի աղբյուրը՝ Խաչիկ Գալստյան- «Բանակցային տեխնոլոգիաներ»