Ուղեկցող
նամակն այն բանի ապացույցն է, որ Դուք իսկապես ցանկանում եք աշխատել տվյալ ընկերությունում։
Այդ պատճառով ուղեկցող նամակի ոճն ու բովանդակությունը ավելի անհատական մոտեցում են
պահանջում, քան ռեզյումեն։ Աշխատանքի համար դիմելիս ռեզյումեին ուղեկցող նամակ գրելը
ամբողջ աշխարհում վաղուց ընդունված երևույթ է, մինչդեռ Հայաստանում շատերն իրենց ռեզյումեն
ուղարկում են գործատուին առանց անգամ ողջունելու և ներկայանալու, առանց հաստիքը նշելու,
այն էլ՝ տարօրինակ անվանումներով էլեկտրոնային հասցեներից։
Գործատուները
միշտ չէ, որ պահանջում են ուղեկցող նամակ։ Սակայն, եթե պահանջում են, ուրեմն դրա համար
պատճառ ունեն և սպասում են այնտեղ կարդալ․
Ինչու եք Դուք ընտրել
այս գործատուին
Ինչու տվյալ գործատուն
պետք է ընտրի Ձեզ
Անձնական ինֆորմացիա
Ուղեկցող նամակի այս հատվածում ներառում եք անուն-ազգանուն,
բնակության հասցե, հեռախոսահամար, էլեկտրոնային հասցե։
Նախաբան
Առաջին հատվածը պետք է ներառի ուղեկցող նամակ գրելու պատճառը
և նպատակը։ Այս բաժնում նշում եք կոնկրետ պաշտոնը, որի համար դիմում եք, թե ինչ ռեսուրսներից
եք տեղեկացել թափուր պաշտոնի մասին, և ինչով է այն Ձեզ գրավել։ Ինչպես նաև հակիրճ նշում
եք Ձեր կրթության մասին, թե քանի տարի եք սովորել, կամ ինչ աստիճանի կրթություն եք
ստացել։
Հիմնական մաս
Ուղեկցող նամակի երկրորդ հատվածում պետք է պատասխանել «ինչու
հենց ես» հարցին։ Այստեղ խոսեք Ձեր հաջողությունների, փորձառության և հմտությունների
մասին, որոնք առավել կհետաքրքրեն գործատուին, և տվյալ պաշտոնի համար նպատակահարմար
կլինեն։ Իսկ եթե չգիտեք, թե գործատուին ինչ կհետաքրքրի, դիմեք թափուր աշխատատեղի նկարագրի
օգնությանը (հայտարարությունները պետք է միշտ ուշադիր կարդալ ու պահել մի ինչ-որ տեղ
համակարգչում։ Դրանք հարցազրույցին նախապատրաստվելիս էլ են շատ օգնում)։ Այս բաժնում
անհրաժեշտ է նաև ներկայացնել Ձեր հետաքրքրվածությունը տվյալ պաշտոնի, կազմակերպության,
դրա մատուցած ծառայությունների հանդեպ։ Լավ կլինի ցույց տալ, որ ուսումնասիրել եք կազմակերպությունը՝
նշելով Ձեր վերաբերմունքը նրա տեսլականի, նպատակների մասին։
Վերջաբան
Ավարտեք նամակը դրական ձևով, շնորհակալություն հայտնեք գործատուին՝
Ձեզ հատկացրած ժամանակի համար, և նորից շեշտադրեք իրենց հետ աշխատելու Ձեր ցանկությունը։
Մի քանի խորհուրդ
Վերջաբանում մի քիչ
հումորը չի խանգարի
Մի խնդրեք մեկ ուրիշին,
որ Ձեր փոխարեն գրի, Դուք դեռ հարցազրույցի եք գնալու ու ներկայացնելու եք Ձեզ
Առանձնացեք, այնպես
արեք, որ Ձեզ հիշեն, Ձեր մասին պատմեն կոլեգաներին
Առհասարակ, ավելի լավ
է դիմել երկու գործատուի, բայց ճիշտ ու ամբողջական ուշադրություն ու ժամանակ տրամադրել,
քան հակառակը
Նյութի աղբյուրը՝ Թամարա Ավանեսյան- «Բիզնեսը և էթիկան»
Comments
Post a Comment